നമുക്കിടയില്‍

നമ്മുക്കിടയില്‍ എന്താണെന്നെനിക്കിന്നുമറിയില്ല
എന്തായാലും അത് പ്രണയമല്ലയിരുന്നു
അതൊരിക്കലും വെറുപ്പോ അറപ്പോ അല്ലായിരുന്നു
എനിക്കിനിയും ഗ്രഹിക്കാത്ത മറെന്തോ ഒന്ന്

ഹൃദയത്തില്‍ കൊത്തിവലിക്കുന്ന നോട്ടംകൊണ്ടുനീ
  കാന്തംപോലെ എന്നെ  നിന്നിലേക്ക്‌ വലിച്ചിട്ടു
അപ്പോള്‍ എനിക്ക് തോന്നി  നമ്മള്‍ ഇണക്കുരുവികള്‍,
ഒരുമിക്കാന്‍ കാലം വിധിയെഴുതിയവര്‍ എന്ന്

ഉള്ളിലെ കത്തുന്ന തീക്കനല്‍ തൊട്ടറിഞ്ഞനാള്‍
അറിയാതെ ഞാന്‍ അകലം പാലിച്ചു
അന്നെന്‍റെയുള്ളിന്‍റെയുള്ളില്‍ ആരോ മന്ത്രിച്ചു
അകലാന്‍ വിധിയുള്ള ഏകധ്രുവങ്ങള്‍ നമ്മളെന്ന്

എന്‍റെ ഹൃത്തടത്തില്‍ കൈതൊട്ടപ്പോള്‍ ഞാന്‍ അറിഞ്ഞു
ആ മിടിപ്പുകള്‍ക്ക് നിന്നോടെന്തോ പറയാന്‍ ബാക്കിയുണ്ടെന്ന്
നമുക്കിടയില്‍ പ്രണയത്തിന്‍റെ ബന്ധനം തീര്‍ക്കാത്ത
പ്രപഞ്ച ശക്തികളെ ഞാനന്ന് ശപിച്ചു , വെറുതെ ശപിച്ചു

നമുക്കിടയില്‍ പക്ഷെ എന്തോ ഉണ്ടായിരുന്നു
വാക്കിനും നോക്കിനും മൌനത്തിനുമപ്പുറം
നമുക്കിടയില്‍ ഒരു വഴിമരുന്നുണ്ടായിരുന്നു
അതിപ്പോഴും തീകാത്തുകിടക്കുന്നു .........